നേരത്തെ എവേ മത്സരത്തിൽ ജംഷഡ്പൂരിനെ പരാജയപ്പെടുത്തിയതിന്റെ ആത്മവിശ്വാസത്തിലാണ് ബ്ലാസ്റ്റേഴ്‌സ്.
തുടർച്ചയായ ഏഴ് മത്സരങ്ങളിൽ തോൽവി അറിയാത്ത ടീം, ഐഎസ്എൽ പോയിന്റ് പട്ടികയിൽ മൂന്നാം സ്ഥാനത്താണ്.
ഈ സാഹചര്യത്തിൽ ബ്ലാസ്റ്റേഴ്സാണ് മത്സരത്തിലെ ഫേവറിറ്റുകൾ. എന്തായാലും നിരാശാജനകമായ സീസണിലൂടെ കടന്നുപോകുന്ന ജംഷഡ്പൂർ ഒന്നും നഷ്ടപ്പെടാനില്ല.
ജംഷഡ്പൂരിനെതിരെ കൊച്ചി സ്റ്റേഡിയത്തിൽ ആദ്യ ജയമാണ് ബ്ലാസ്റ്റേഴ്‌സ് ലക്ഷ്യമിടുന്നത്. ഐഎസ്എൽ 2017-18 സീസണിലാണ് ജംഷഡ്പൂർ അരങ്ങേറിയത്. തുടർന്ന് കൊച്ചിയിൽ ഇരുടീമുകളും മൂന്ന് തവണ ഏറ്റുമുട്ടി. മൂന്ന് തവണയും സമനിലയായിരുന്നു ഫലം.
ആദ്യ തവണ ഗോൾ രഹിത സമനിലയിൽ അവസാനിച്ചപ്പോൾ രണ്ടാം തവണ ഇരു ടീമുകളും ഓരോ ഗോൾ വീതം നേടി സമനിലയിൽ പിരിഞ്ഞു.
2019-20 സീസണിലാണ് ഇരു ടീമുകളും അവസാനമായി കൊച്ചിയിൽ ഏറ്റുമുട്ടിയത്. രണ്ട് ഗോളുകൾ വീതം നേടി അതും സമനിലയിൽ പിരിഞ്ഞു.
