മുംബൈ: വധുവിനെ കണ്ടെത്താനാകാതെ യുവാക്കൾ കലക്ടറുടെ ഓഫീസിലേക്ക് മാർച്ച് നടത്തി.
മഹാരാഷ്ട്രയിലെ സോലാപൂർ ജില്ലയിൽ ഇന്നലെയാണ് സംഭവം.
സ്ത്രീ-പുരുഷ അനുപാതം ഉന്നയിച്ച് ഒരുകൂട്ടം യുവാക്കൾ മാർച്ച് നടത്തി. ജ്യോതി ക്രാന്തി പരിഷത്ത് 'ബ്രൈഡ്‌ഗ്രൂം മോര്‍ച്ച'' എന്ന പേരിൽ ജാഥ സംഘടിപ്പിച്ചു.
മാർച്ചിന് ശേഷം ഇവർ ജില്ലാ കളക്ടർ ഓഫീസിൽ നിവേദനം നൽകി. ഘോഷയാത്രയിൽ പങ്കെടുത്തവർക്ക് വധുവിനെ സർക്കാർ കണ്ടെത്തണമെന്നും ഡയഗ്‌നോസ്റ്റിക് പരിശോധനകള്‍ (പി സി പി എന്‍ ഡി റ്റി) സംബന്ധിച്ച നിയമം കര്‍ശനമാക്കണമെന്നും നിവേദനത്തിൽ അവർ ചൂണ്ടിക്കാട്ടുന്നു.
ബാൻഡ് മേളത്തിന്റെ അകമ്പടിയോടെയാണ് ഇവർ വിവാഹ വേഷത്തിൽ കുതിരപ്പുറത്ത് നീങ്ങിയത്. ആളുകൾക്ക് ദേഷ്യം വന്നേക്കാം. എന്നാൽ, സംസ്ഥാനത്ത് വിവാഹപ്രായമായ പുരുഷന്മാർക്ക് വധുവിനെ കണ്ടെത്താൻ കഴിയുന്നില്ലെന്നതാണ് യാഥാർത്ഥ്യമെന്ന് ജ്യോതി ക്രാന്തി പരിഷത്ത് സ്ഥാപകനും ജാഥ സംഘാടകനുമായ രമേഷ് ഭരാസ്‌കർ പറഞ്ഞു.
സ്ത്രീ-പുരുഷ അനുപാതത്തിലെ പ്രശ്‌നങ്ങളാണ് ഇതിന് കാരണം. മഹാരാഷ്ട്രയിലെ ആൺ-പെൺ അനുപാതം 1000-889 ആണ്. പെൺഭ്രൂണഹത്യയാണ് ഇതിന് കാരണം. ഇതിന് ഉത്തരവാദി സർക്കാരാണെന്നും രമേശ് ചൂണ്ടിക്കാട്ടി.
