ഫാം. ഡി കോഴ്സിന് വളരെയേറെ സാദ്ധ്യതകളാണ് ലോകമെമ്ബാടുമുള്ളത്. ഫാർമസി വ്യവസായം, ഗവേഷണം, അദ്ധ്യാപനം, പ്രാക്ടീസ് മേഖലകളില്‍ ഫാം ഡി പൂർത്തിയാക്കിയവർക്ക് രാജ്യത്തിനകത്തും വിദേശരാജ്യങ്ങളിലും അവസരങ്ങളേറെയുണ്ട്.
2008- ലാണ് ഇന്ത്യ ഗവണ്മെന്റും ഫാർമസി കൗണ്‍സില്‍ ഒഫ് ഇന്ത്യയും ചേർന്ന് 6 വർഷ ഫാം ഡി കോഴ്‌സാരംഭിച്ചത്. ഇതില്‍ ഒരുവർഷം ഇന്റേണ്‍ഷിപ്പാണ്. 5 വർഷമാണ് പഠനകാലയളവ്. ഫിസിക്സ്, കെമിസ്ട്രി മാത്സ്/ബയോളജിയോടെ പ്ലസ് ടു സയൻസ് ഗ്രൂപ്പ് ജയിച്ചവർക്ക് ഫാം ഡി കോഴ്സിന് ചേരാം.
കോഴ്‌സ് പൂർത്തിയാക്കിയവർക്ക് ക്ലിനിക്കല്‍ ഫാർമസിസ്റ്റ്, ഹോസ്പിറ്റല്‍ ഫാർമസി ഡയറക്ടർ, ഡ്രഗ് സേഫ്റ്റി അഡ്വൈസർ, മെഡിക്കല്‍ റൈറ്റർ, സയന്റിസ്റ്റ്, ഡ്രഗ് ഇൻസ്‌പെക്ടർ തുടങ്ങി വിവിധ തസ്തികകളില്‍ പ്രവർത്തിക്കാം. റിസർച്ച്‌ & ഡെവലപ്‌മെന്റ്, മാനുഫാക്ചറിംഗ്, ക്ലിനിക്കല്‍ റിസർച്ച്‌, റെഗുലേഷൻ, ബയോഇൻഫോർമാറ്റിക്‌സ്, കോഡിംഗ്, ഡ്രഗ് ഡിസ്‌കവറി, അധ്യാപനം തുടങ്ങി വിവിധ മേഖലകളില്‍ അവസരങ്ങളുണ്ട്. അമേരിക്ക, യു.കെ, യൂറോപ്യൻ രാജ്യങ്ങള്‍, ഓസ്‌ട്രേലിയ, കാനഡ എന്നീ രാജ്യങ്ങളില്‍ ഇംഗ്ലീഷ് പ്രാവീണ്യ പരീക്ഷയും ഫാർമസി ലൈസൻസിംഗ് ടെസ്റ്റും പൂർത്തിയാക്കി ഫാർമസിസ്റ്റായി പ്രാക്ടീസ് ചെയ്യാം. കാനഡ, ഓസ്‌ട്രേലിയൻ ഇമിഗ്രേഷനും അവസരങ്ങളുണ്ട്.
ബി.ബി.എ എയർലൈൻ ആൻഡ് എയർപോർട്ട് മാനേജ്‌മെന്റ്
ലോകത്താകമാനം വ്യോമയാന, ടൂറിസം, ഹോസ്പിറ്റാലിറ്റി രംഗത്തു വൻ സാദ്ധ്യതകളാണുള്ളത്. സേവന മേഖലയിലെ വളർച്ചയ്ക്കാനുപാതികമായി ഈ മേഖലയില്‍ കൂടുതല്‍ തൊഴിലവസരങ്ങള്‍ ദൃശ്യമാകും. രണ്ടാംകിട നഗരങ്ങളില്‍ പോലും എയർപോർട്ടുകളുടെ എണ്ണത്തില്‍ വൻ വർധനവാണ് ലക്ഷ്യമിടുന്നത്.
രാജ്യത്തിനകത്തും വിദേശത്തും വ്യോമയാന, ഹോസ്പിറ്റാലിറ്റി, ടൂറിസം രംഗത്ത് ആയിരക്കണക്കിന് തൊഴിലവസരങ്ങള്‍ മുന്നോട്ട് പ്രതീക്ഷിക്കുന്നു. കോഴ്‌സ് പൂർത്തിയാക്കിയവർക്ക് എയർലൈൻ കമ്ബനികള്‍, എയർപോർട്ടുകള്‍, ടൂറിസം മേഖല, ഓണ്‍ലൈൻ ടിക്കറ്റിംഗ് സിസ്റ്റം, ഇ കോമേഴ്‌സ് കമ്ബനികള്‍ എന്നിവയില്‍ അസിസ്റ്റന്റ് മാനേജർ, സൂപ്പർവൈസർ, ഫ്രണ്ട് ഓഫീസ്, എയർപോർട്ട് പ്ലാനിംഗ്, സേഫ്റ്റി & സെക്യൂരിറ്റി, കാർഗോ, ഹൗസ്‌കീപ്പിങ് മാനേജർ തുടങ്ങി വിവിധ തലങ്ങളില്‍ പ്രവർത്തിക്കാം.
ബി.ബി.എ പൂർത്തിയാക്കിയവർക്ക് ഇന്ത്യയ്ക്കകത്തും വിദേശത്തും മാനേജ്മന്റ്, സപ്ലൈ ചെയിൻ, ലോജിസ്റ്റിക് തുടങ്ങിയ മേഖലകളില്‍ എം.ബി.എ പ്രോഗ്രാമിന് ചേരാം. പഠനത്തോടൊപ്പം മികച്ച ഇംഗ്ലീഷ് പ്രാവീണ്യം, ആശയവിനിമയ ശേഷി, ടെക്‌നിക്കല്‍ & ഡൊമൈൻ സ്‌കില്‍ എന്നിവ കൈവരിക്കാൻ ശ്രമിക്കണം. DGCA , IATA അംഗീകൃത സ്ഥാപനങ്ങളില്‍ പഠിക്കാൻ ശ്രമിക്കണം. കാമ്ബസ് പ്ലേസ്‌മെന്റ് ഉറപ്പുവരുത്തണം. പ്ലസ് ടു ഏതു ഗ്രൂപ്പെടുത്തു പഠിച്ചവർക്കും ബി.ബി.എ എയർലൈൻ & എയർപോർട്ട് മാനേജ്മന്റ് പ്രോഗ്രാമിന് ചേരാം.
