പ്രോസ്‌പെര എന്ന പേരിലുള്ള പുതിയ എൻആർഇ സേവിംഗ്സ് അക്കൗണ്ട് ഫെഡറല്‍ ബാങ്ക് പുറത്തിറക്കി. 60 ലക്ഷം രൂപയുടെ കോംപ്ലിമെന്ററി ഇൻഷുറൻസ് ആനുകൂല്യങ്ങളും എയർപോർട്ട് ലൗഞ്ച് ആക്സസും ഡെബിറ്റ് കാർഡ് സ്‌പെൻഡിന് റിവാർഡ് പോയിന്റുകളും ഉള്‍പ്പെടെ അനേകം ആനുകൂല്യങ്ങള്‍ ഉള്‍ക്കൊള്ളിച്ച്‌, ജീവിതത്തില്‍ മുന്നേറാൻ ഉത്സുകരായ പ്രവാസികള്‍ക്ക് അനുയോജ്യമായ വിധത്തില്‍ രൂപകല്‍പ്പന ചെയ്തതാണ് പ്രോസ്‌പെര എൻആർഇ സേവിംഗ്സ് അക്കൗണ്ട്.
പ്രാരംഭ ഓഫർ എന്ന നിലയില്‍, തിരഞ്ഞെടുത്ത യാത്രാ പ്ലാറ്റ്‌ഫോമുകളില്‍ ഫ്ളൈറ്റ്, ഹോട്ടല്‍ ബുക്കിംഗുകള്‍ക്ക് 24 ശതമാനം വരെ കിഴിവ് ലഭ്യമാണ്.
2024 സെ്ര്രപംബറില്‍ ചുമതലയേറ്റെടുത്ത ശേഷം ഫെഡറല്‍ ബാങ്കിന്റെ മാനേജിംഗ് ഡയറക്ടറും സി ഇ ഓയുമായ കെ വി എസ് മണിയൻ അന്താരാഷ്ട്ര തലത്തില്‍ നടത്തിയ ആദ്യ പത്രസമ്മേളനത്തെ തുടർന്നാണ് പ്രോസ്‌പെര അവതരിപ്പിച്ചത്. ഗള്‍ഫ് മേഖലയിലെ പ്രവാസി സമൂഹവുമായി ഫെഡറല്‍ ബാങ്കിനുള്ള സുദൃഢമായ ബന്ധത്തെക്കുറിച്ച്‌ അദ്ദേഹം സംസാരിച്ചു.
'ഏഴുപതിറ്റാണ്ടിലധികമായി, ലോകമെമ്ബാടുമുള്ള പ്രവാസികളുടെ സാമ്ബത്തിക അഭിലാഷങ്ങള്‍ സഫലീകരിക്കാനും നാടുമായുള്ള ആത്മബന്ധം കാത്തുസൂക്ഷിക്കാനും സഹായിക്കുന്ന ഒരു വിശ്വസ്തപങ്കാളിയാണ് ഫെഡറല്‍ ബാങ്ക്,' കെ വി എസ് മണിയൻ പറഞ്ഞു.
'ഇന്ന് ഇന്ത്യയിലേക്കുള്ള വ്യക്തിഗത റെമിറ്റൻസിന്റെ അഞ്ചിലൊന്നും ഫെഡറല്‍ ബാങ്ക് വഴിയാണെന്നത് പ്രവാസിസമൂഹവും ഞങ്ങളുടെ റെമിറ്റൻസ് പങ്കാളികളും ബാങ്കില്‍ അർപ്പിച്ചിട്ടുള്ള വിശ്വാസത്തിന് നിദർശനമാണ്. അടിസ്ഥാന ബാങ്കിംഗ് സൗകര്യങ്ങള്‍ക്കപ്പുറം, തങ്ങളുടെ ജീവിതശൈലിയ്ക്കും അഭിലാഷങ്ങള്‍ക്കും ചേർന്ന ബാങ്കിംഗ് അനുഭവങ്ങള്‍ പ്രതീക്ഷിക്കുന്നവരാണ് ഇന്നത്തെ പ്രവാസികളെന്ന് ഞങ്ങള്‍ക്കു മനസിലാക്കാൻ സാധിച്ചിട്ടുണ്ട്. ഇടപാടുകാരുടെ ആവശ്യങ്ങള്‍ക്കും മാറുന്ന സാഹചര്യങ്ങള്‍ക്കും ചേർന്ന തരത്തില്‍ ഞങ്ങളുടെ ഉത്പന്നങ്ങളും സേവനങ്ങളും നിരന്തരം മെച്ചപ്പെടുത്തുന്നതില്‍ ഞങ്ങള്‍ പ്രതിജ്ഞാബദ്ധരാണ്.'
ബാങ്കിന്റെ എക്സിക്യൂട്ടീവ് വൈസ് പ്രസിഡന്റും ഡെപ്പോസിറ്റ്സ്, വെല്‍ത് ആൻഡ് ബാൻകാ കണ്‍ട്രി ഹെഡുമായ ജോയ് പി വി, എക്സിക്യൂട്ടീവ് വൈസ് പ്രസിഡന്റും ബ്രാഞ്ച് ബാങ്കിംഗ് ഹെഡുമായ ഇക്ബാല്‍ മനോജ്, അബുദാബിയിലെ ചീഫ് റെപ്രസന്റേറ്റീവ് ഓഫീസർ അരവിന്ദ് കാർത്തികേയൻ, ദുബായിലെ ചീഫ് റെപ്രസെന്റേറ്റീവ് ഓഫീസർ ഷെറിൻ കുര്യാക്കോസ് എന്നീ മുതിർന്ന ഉദ്യോഗസ്ഥരും മണിയന്റെ ഒപ്പമുണ്ടായിരുന്നു.
'ഇന്ത്യൻ പ്രവാസികളുടെ മാറിവരുന്ന താല്പര്യങ്ങളെപ്പറ്റി ഞങ്ങള്‍ക്കുള്ള ധാരണയും അവർക്കു മികച്ച സേവനം ഉറപ്പു വരുത്തുന്നതില്‍ ഞങ്ങള്‍ക്കുള്ള പ്രതിബദ്ധതയും പുതിയ ഓഫറുകളില്‍ ദൃശ്യമാണ്,' ജോയ് പി വി പറഞ്ഞു. ഫെഡറല്‍ ബാങ്കിന്റെ മൊബൈല്‍ ബാങ്കിങ് പ്ലാറ്റഫോമായ ഫെഡ്‌മൊബൈല്‍ വഴി പ്രവാസികള്‍ക്ക് പോർട്ട്‌ഫോളിയോ ഇൻവെസ്റ്റ്‌മെന്റ് സ്‌കീം (പി ഐ എസ്) അക്കൗണ്ട് തുടങ്ങാൻ സൗകര്യമൊരുക്കുന്ന പുതിയ സംവിധാനത്തിന്റെ ഉദ്ഘാടനം ഇക്ബാല്‍ മനോജ് നിർവഹിച്ചു. ഈ സൗകര്യമുപയോഗിച്ച്‌ പ്രവാസികള്‍ക്ക് ഓഹരിവിപണിയില്‍ നിക്ഷേപം നടത്താവുന്നതാണ്.
റെമിറ്റൻസ് സർവീസില്‍ മുൻനിര ബാങ്ക്, രാജ്യാന്തര പണമിടപാടില്‍ ഡിജിറ്റല്‍ നവീകരണം, പ്രധാന എൻആർഐ മാർക്കറ്റുകളില്‍ ഉടനീളം ശക്തമായ സാന്നിധ്യം, ലോകമെമ്ബാടുമുള്ള ശക്തമായ റെമിറ്റൻസ് പാർട്ണർഷിപ് നെറ്റ് വർക്ക്, പ്രവാസി നിക്ഷേപങ്ങളില്‍ സുസ്ഥിരമായ വളർച്ച തുടങ്ങി എൻആർഐ ബാങ്കിംഗ് മേഖലയില്‍ കൈവരിച്ച നേട്ടങ്ങളെക്കുറിച്ചും ബാങ്ക് എടുത്തു പറഞ്ഞു.
