വീട്ടില്‍ നിന്ന് പാമ്ബിനെ പിടികൂടുന്ന നിരവധി സംഭവങ്ങള്‍ റിപ്പോർട്ട് ചെയ്തിട്ടുണ്ട്. കിടപ്പുമുറിയിലോ അടുക്കളയിലോ ഇവയെ കാണുമ്ബോള്‍ എന്ത് ചെയ്യണമെന്നറിയാതെ തരിച്ചുനിന്നുപോകുന്നവർ ഒരുപാടുണ്ട്.
ശാന്തത പാലിക്കുക എന്നതാണ് ഏറ്റവും പ്രധാനം.
പാമ്ബുകള്‍ പൊതുവെ ആക്രമണകാരികളല്ലെന്നാണ് പറയപ്പെടുന്നത്. തങ്ങള്‍ക്ക് ഭീഷണിയാണെന്ന് തോന്നുന്ന സാഹചര്യങ്ങളിലാണ് അവ ആക്രമിക്കുക. പാമ്ബിനെ കണ്ടയുടൻ ഉച്ചത്തില്‍ ശബ്ദമുണ്ടാക്കുകയോ മറ്റോ ചെയ്യുന്നത് അതിനെ പ്രകോപിപ്പിക്കും.
ആദ്യം തന്നെ ദീർഘനിശ്വാസമെടുക്കുക. അകലം പാലിക്കുക. പാമ്ബില്‍ നിന്ന് കുറഞ്ഞത് ആറ് മുതല്‍ എട്ട് അടി വരെ അകലം നിലനിർത്തുക. വളർത്തുമൃഗങ്ങളോ ചെറിയ കുട്ടികളോ ഉണ്ടെങ്കില്‍ പെട്ടെന്നുതന്നെ അവരെ ആ മുറിയില്‍ നിന്ന് പുറത്തിറക്കി സുരക്ഷിതമായ സ്ഥലങ്ങളിലേക്ക് മാറ്റുക. പാമ്ബുമായി ഇടപഴകാനോ ഫോട്ടോ എടുക്കാനോ ശ്രമിക്കുന്നത് ഒഴിവാക്കുക.
കിടപ്പുമുറി, അടുക്കള തുടങ്ങിയ സ്ഥലത്താണ് പാമ്ബ് ഉള്ളതെങ്കില്‍, വീടിന്റെ മറ്റ് ഭാഗങ്ങളിലേക്ക് അത് നീങ്ങുന്നത് തടയാൻ വാതില്‍ അടയ്ക്കുക. ഒരു ടവലോ മറ്റോ ഉപയോഗിച്ച്‌ വാതിലിന്റെ അടിയിലുള്ള വിടവ് അടയ്ക്കുക. ശേഷം അടുത്തുള്ള പാമ്ബ് പിടിത്തക്കാരെ വിവരമറിയിക്കുക. പറ്റുമെങ്കില്‍ പാമ്ബ് എവിടേക്കാണ് പോകുന്നതെന്നും മറ്റും ദൂരെ നിന്ന് നിരീക്ഷിക്കുക.
പാമ്ബിനെ എങ്ങനെ തുരത്താം
എലി, തവള തുടങ്ങിയ ജീവികളെ പിടികൂടാനായാണ് പാമ്ബ് പ്രധാനമായും എത്തുന്നത്. ഈ ജീവികളെ തുരത്തുകയാണ് പ്രധാനമായും വേണ്ടത്. അതുവഴി പാമ്ബിനെയും അകറ്റാം.
പൂമുഖത്തെ വാതിലിന് താഴെയും ജനാലകള്‍ക്ക് ചുറ്റുമുള്ള വിടവുകള്‍ തുണിയോ മറ്റോ ഉപയോഗിച്ച്‌ അടയ്ക്കുക.
പാമ്ബുകള്‍ ഒളിച്ചിരിക്കാൻ സാദ്ധ്യതയുള്ള പൂന്തോട്ടങ്ങള്‍ വൃത്തിയാക്കുക. മുറ്റത്തോ പറമ്ബിലോ എലിയുടെയോ മറ്റോ മാളമുണ്ടോയെന്ന് ശ്രദ്ധിക്കുക. ഉണ്ടെങ്കില്‍ അത് അടയ്ക്കുക.
പാമ്ബുകള്‍ ഇരുണ്ടതും ശാന്തവുമായ സ്ഥലങ്ങളാണ് ഇഷ്ടപ്പെടുന്നത് എന്നതിനാല്‍ വൈകുന്നേരങ്ങളില്‍ പുറത്തെ ലൈറ്റുകള്‍ ഓണാക്കുക.
വെള്ളം കെട്ടിക്കിടക്കുന്ന സ്ഥലത്തും പാമ്ബ് എത്താൻ സാദ്ധ്യതയുണ്ട്. ചോർന്നൊലിക്കുന്ന ടാപ്പുകളും മറ്റുമുണ്ടെങ്കില്‍ നന്നാക്കുക. പൂന്തോട്ടത്തില്‍ ചെറിയ താമരക്കുളമോ മറ്റോ ഉണ്ടെങ്കില്‍ എപ്പോഴും ശ്രദ്ധവേണം.
ക്ലവ് ഓയില്‍ (clove oil) മണം പാമ്ബിന് അസഹനീയമാണ്. ക്ലവ് ഓയില്‍ കുറച്ച്‌ വീടിന് ചുറ്റും തളിച്ചുകൊടുക്കുന്നത് പാമ്ബിനെ അകറ്റാൻ സഹായിക്കുമെന്നാണ് പറയപ്പെടുന്നത്. ഇത് എത്രത്തോളം ശരിയാണെന്ന് വ്യക്തമല്ല.
ഇഞ്ചിപ്പുല്ല് വീടിന്റെ മുറ്റത്ത് നട്ടാല്‍ പാമ്ബുകള്‍ വരാൻ സാദ്ധ്യത കുറവാണത്രേ. വീട്ടുപരിസരത്ത് ചപ്പുചവറുകള്‍ കൂട്ടിയിടരുത്.
